Fréttabréf Viðskiptaráðs 5.febrúar 2010

Fréttir vikunnar

Umhverfisráðherra tefur fyrir uppbyggingu

Nú í vikunni synjaði umhverfisráðherra staðfestingar skipulagsbreytingum varðandi Þjórsárvirkjanir og ljóst má vera að ákvörðunin mun tefja mikið áætlaða uppbyggingu á svæðinu. Ekkert í skipulags- og byggingarlögum bannar sveitarfélögum að afla tekna til að standa straum af gerð aðalskipulags. Það er því í meira lagi undarleg lagatúlkun ráðherra að þar sem þetta sé ekki sérstaklega heimilt samkvæmt lögum, þá hljóti umrædd fjármögnun að stangast á við lög. Þarna er langt seilst til að framfylgja persónulegum skoðunum ráðherra og virðist ákvörðunin lítið hafa með málefnalega afgreiðslu á efni skipulagstillagna sveitarfélaganna að gera.

Viðskiptaráð hefur lagt áherslu á mikilvægi fjárfestingar og verðmætasköpunar við þær aðstæður sem nú ríkja í íslensku efnahagslífi. Til að efla megi tekjugrunn hins opinbera, skapa ný störf og koma hagkerfinu á kjöl á nýjan leik er nauðsynlegt að efla hagvöxt og útflutningstekjur þjóðarinnar. Með afstöðu sinni til stóriðjuframkvæmda stendur umhverfisráðherra með beinum hætti gegn endurreisn hagkerfisins með tilheyrandi búsifjum fyrir íslenskt atvinnulíf og heimili. Meira um málið hér.

40% fyrirtækja í samkeppni við hið opinbera

Samhliða Viðskiptaþingi sem haldið verður þann 17. febrúar verður birt könnun um rekstrarumhverfi fyrirtækja á Íslandi sem Viðskiptaráð lét framkvæma nú í janúar. Niðurstöður hennar verða útfærðar nánar í skýrslu um efnið en meðal áhugaverðra niðurstaðna könnunarinnar er að 40% aðspurðra telja opinberar stofnanir eða fyrirtæki í opinberum rekstri vera í samkeppni við sitt fyrirtæki. Þá telja 51% fyrirtækja í þjónustu sig vera í samkeppni við hið opinbera, 49% fyrirtækja í verslun og 58% fyrirtækja í byggingar- eða verktakastarfsemi.

Auk þess telja fyrirtæki, sem eru í miklum alþjóðlegum viðskiptum, sig vera í samkeppni við hið opinbera. Niðurstöðurnar vekja óneitanlega upp spurningar varðandi umfang þjónustuframboðs hins opinbera og hvort verkaskipting ríkis og einkaaðila sé eins og best verður á kosið.

Hópstefnumót íslensks atvinnulífs

Í maí 2009 tók viðskiptalífið ákvörðun um að hvetja til og leggja áherslu á að konum í forystusveit íslensks atvinnulífs yrði fjölgað. Þetta var gert með samstarfssamningi milli Félags kvenna í atvinnurekstri, Viðskiptaráðs Íslands og Samtaka atvinnulífsins. Markmið samningsins er að hlutfall hvors kyns verði ekki undir 40% í lok árs 2013, en Creditinfo hefur séð um mælingar á verkefninu. Með þessu er viðskiptalífið að taka sjálft ábyrgð og forystu í þessu brýna hagsmunamáli.

Í næstu viku, þann 10. febrúar, mun svo fjölbreyttur hópur fólks úr atvinnulífinu koma saman á Hilton Reykjavík Nordica, en þá fer fram fundurinn Virkjum karla og konur - fjölbreytni í forystu. Fundurinn er haldinn af fyrrnefndum aðilum í samstarfi við Leiðtoga-Auði, efnahags- og viðskiptaráðuneytið og iðnaðarráðuneytið. Þar verður m.a. greint frá því hvaða leiðir viðskiptalífið hyggst fara til að fjölga konum í stjórnum fyrirtækja auk þess sem nýjar tölur Creditinfo um kynjahlutföll í atvinnulífinu verða birtar. Konur og karlar sem koma saman til fundarins greiða aðeins eitt þátttökugjald en til þessa hafa fundir sem fjalla um karla og konur í forystusveit atvinnulífsins einkum verið sóttir af konum. Nánar hér.

Fjármál ríkisins og leiðir út úr kreppunni

Mikið hefur verið fjallað um fjármál ríkisins á undanförnum vikum og mánuðum. Í máli Frosta Ólafssonar, aðstoðarframkvæmdastjóra Viðskiptaráðs á morgunverðarfundi um stöðu og horfur ríkisfjármála í síðustu viku kom fram að til þess að efnahagsáætlun AGS gengi upp væri einkar mikilvægt að ná tökum á fjármálum ríkissjóðs . Þar benti hann á að skattkerfið hér á landi væri ekki rót þess vanda sem nú er við etja, enda hafi það verið einfalt, hagkvæmt og til þess fallið að jafna hagsveiflur. Vandann megi þvert á móti einkum rekja til ósjálfbærrar útgjaldaþróunar í ríkisfjármálum.

Hagræðing í ríkisrekstri
Viðskiptaráð leggur áherslu á það að ríkisfjármálin eru lykilatriði í efnahagslegri endurreisn landsins, en með viðsnúningi í ríkisfjármálum má efla lánshæfismat ríkissjóðs og annarra stofnana hagkerfisins á nýjan leik. Þetta kom Finnur Oddsson framkvæmdastjóri ráðsins inn á í erindi sínu á fundinum Sóknaráætlun fyrir Ísland í síðustu viku sem haldinn var af stýrihópnum 20/20. Í máli hans kom einnig fram að ábyrg stefna í ríkisfjármálum efli trúverðugleika íslensku krónunnar og stuðli jafnframt að styrkingu hennar. Mikilvægt er að ekki verði ráðist í frekari skattahækkanir heldur verði aðlögun náð fram með hagræðingu í ríkisrekstri. Finnur minnti að lokum á það að leggja verður ríkari áhersla á samstöðu og samstarf um aðgerðir sem stuðla að hagvexti og þ.a.l. bættum lífskjörum.

Við hvetjum félaga til að kynna sér efni skýrslunnar Fjármál hins opinbera - aðrar leiðir færar, sem má nálgast hér.

Viðburðir framundan

Viðskiptaþing 2010: Innsýn í ástand og áskoranir

Nú fer að líða að Viðskiptaþingi 2010 en það fer fram 17. febrúar næstkomandi. Á meðal dagskrárliða verða pallborðsumræður með fulltrúum íslensks atvinnulífs um málefni þingsins. Þátttakendurnir koma víða að og má því vænta þess að þeir gefi góða innsýn í ástand og áskoranir íslensks atvinnulífs í dag.

Við hvetjum félagsmenn sérstaklega til að taka þátt í þinginu, en það hefur unnið sér sess sem einn af stærstu viðburðum íslensks atvinnulífs á ári hverju. Skráningargjald er kr. 12.000 fyrir félagsmenn Viðskiptaráðs, en ef fleiri en tveir skrá sig frá sama aðildarfyrirtæki er skráningargjald kr. 10.000 á mann. Skráningargjald fyrir utanfélagsmenn er kr. 15.000. Skráning fer fram hér.

Bjartsýni í vikulok

Í ljósi mikils vægis neikvæðra frétta undanfarin misseri er ekki úr vegi að minna á það sem vel gengur. Viðskiptaráð mun því reglulega draga saman það helsta sem telst til jákvæðra frétta, en það er gert til að minna á að þrátt fyrir erfitt efnahagsástand hérlendis og erlendis er margt á réttri leið. Það er von Viðskiptaráðs að áður en um of langt líður horfi til betri vegar og samantekt af þessu tagi verði óþörf.

Þýska fyrirtækið Clearstream bættist við í vikunni sem aðili að Kauphöllinni á Íslandi, en þetta mun veita erlendum fjárfestum greiðari aðgang að íslenska markaðnum
Búast má við því að 15 fyrirtæki verði skráð í Kauphöllinni á þessu ári að mati Þórðar Friðjónssonar forstjóra hennar. Velta með hlutabréf í janúar var heldur meiri en mánuðinn á undan og þá hefur úrvalsvísitalan hækkað um rúm 10% síðustu 6 mánuði
Krónan styrktist í vikunni og hefur nú ekki verið sterkari gagnvart evru í rúmt hálft ár en það hefur leitt til þess að kaupmenn hafa getað haldið aftur af verðhækkunum hjá sér síðustu tvo mánuði
Vöruskipti í janúar voru hagstæð um 10,1 ma. kr., en afgangur hefur nú verið af vöruskiptum í hverjum mánuði frá því í október 2008
Capacent hefur upp á síðkastið unnið alþjóðlega könnun fyrir Alþjóðabankann í Washington og hefur nú gert áframhaldandi samning við bankann um frekari úrvinnslu á niðurstöðum og eftirfylgni þeirra
Allt bendir til þess að ferðasumarið verði gott, en bókanir erlendra ferðamanna á flugferðum til Íslands eru um 15% fleiri nú en á sama tíma í fyrra
Á sama tíma aukast utanlandsferðir Íslendinga, en í janúar fjölgaði utanferðum íslendinga um 7,4% frá sama tíma í fyrra
Fjögur fyrirtæki hafa verið tilnefnd til íslensku þekkingarverðlaunanna en það eru CCP, Fjarðarkaup, Icelandair Group og Össur, en Félag viðskipta- og hagfræðinga afhendir nú verðlaunin í 10. sinn
Trúin á íslenskt efnahagslíf virðist vera að aukast, en á þeim þremur mánuðum sem liðnir eru frá fyrsta skrefi í afnámi gjaldeyrishafta hafa um 5 ma. kr. verið lagðir hér inn á bankareikninga og 4,5 ma. kr. verið varið í fjárfestingar í atvinnurekstri
Annað dæmi um aukna tiltrú á Íslandi er útboð Sjóvá, en þar eru þrír erlendir aðilar meðal þeirra sem bjóða í hlutafé félagsins í opnu útboði Íslandsbanka
Sigbjørn Johnsen fjármálaráðherra Noregs sagði í vikunni að möguleikinn hafi verið ræddur þar í landi að Norðmenn greiddu út Icesave skuld Íslendinga og lánuðu síðan upphæðina aftur til Íslendinga á lægri vöxtum en hingað til hafa staðið til boða
Fjöldi erlendra stórfyrirtækja hefur verið að skila góðum uppgjörum fyrir síðasta ársfjórðung. Meðal þeirra eru olíufélagið BP, danska lyfjafyrirtækið Novo Nordisk, Deutsche Bank, japanski raftækjaframleiðandinn Sony Corp og bílaframleiðandinn Toyota Motors
Danski bankinn FIH sem er í eigu skilanefndar Kaupþings, skilaði hagnaði á síðasta ári, en mikið dró úr afskriftum hjá bankanum á síðari hluta árs 2009

Góða helgi.

Fréttir vikunnar

Umhverfisráðherra tefur fyrir uppbyggingu

40% fyrirtækja í samkeppni við hið opinbera

Hópstefnumót íslensks atvinnulífs

Fjármál ríkisins og leiðir út úr kreppunni

Viðburðir framundan

Viðskiptaþing 2010: Innsýn í ástand og áskoranir

Bjartsýni í vikulok

Í deiglunni:

Nýtt efni:

Viðburðir:

Gamla kornið: