Fréttir vikunnar

Seinkun á endurskipulagningu lengir kreppuna

Í vikunni gaf Seðlabanki Íslands út ritið Fjármálastöðugleiki þar sem farið er yfir uppgjör bakanna á síðasta ári og alla helstu þætti sem lúta að fjármálaumgjörð fyrirtækja og heimila hérlendis. Í skýrslunni kemur fram að endurskipulagning á skuldum fyrirtækja hafi tekið lengri tíma en upphaflega var vænst eftir sem hafi orðið til þess að draga tímabundið úr aukningu atvinnuleysis og gjaldþrotum fyrirtækja. Hins vegar hafi seinkunin valdið því að dregið hafi úr efnahagsbatanum.

Seðlabankinn gerir þó ráð fyrir að endurskipulagningu skulda fyrirtækja ljúki að mestu á þessu ári. Þótt tiltölulega lágt hlutfall fyrirtækja hafi nú þegar orðið gjaldþrota eru vanskil umtalsverð.

Skil á ársreikningum ábótavant
Viðskiptaráð hefur undanfarin misseri bent á nauðsyn þess að efla skil á ársreikningum fyrirtækja. Í Fjármálastöðugleika Seðlabankans má glögglega sjá eina af afleiðingum þess að skil á ársreikningum er ábótavant. Nýjustu upplýsingar um rekstrarafkomu fyrirtækja sem þar er að finna eru nær tveggja ára gamlar, fyrir rekstrarárið 2008, en þrátt fyrir það vantar enn ársreikninga um 42% fyrirtækja.

Þær upplýsingar sem berast t.d. til Seðlabankans í þessu tilfelli gerir öllum aðilum erfiðara um vik að meta raunverulega stöðu atvinnulífsins. Upplýsingaskil eru auk þess forsenda þess að alþjóðleg greiðslutryggingarfélög fáist til að tryggja greiðslur íslenskra fyrirtækja auk þess sem nákvæmari upplýsingar draga úr óvissu í viðskiptalífinu sem er þó næg fyrir. (Mynd: cb.is)

Fjármálastöðugleiki 2010

---

Skattahækkanir á leiðarenda

Í umræðunni að undanförnu um nauðsynlega hagræðingu í opinberum fjármálum hafa fulltrúar ríkisstjórnarinnar látið ummæli falla í þá veru að til standi að auka skatta á atvinnulífið enn frekar og eru þar nefndar tölur upp á ríflega tug milljarð.

Viðskiptaráð vill í því samhengi benda á að megin þungi í aðgerðum stjórnvalda til að ná jöfnuði í ríkisfjármálum hefur hingað til falist í skattahækkunum. Viðskiptaráð hafnar því hugmyndum um frekari hækkun skatta á þessum tímapunkti og telur að rými til skattahækkana hafi verið nýtt til fulls og vel það.

Skatthækkanir, sem lausn á fjármálavanda hins opinbera, eru komnar á leiðarenda og brýnt að draga úr útgjöldum í stað þess að hækka skatta. (Mynd: stjr.is) Meira >>

---

Aðkoma erlendra aðila erfið

Nýlega gaf svissneski viðskiptaháskólinn Institute for Management Development (IMD) út skýrslu um samkeppnishæfni þjóða sem kallast IMD World Competitiveness Yearbook (WCY).

Ímynd og fjölbreytni
Ísland kemur ekki nægilega vel út þegar kemur að fjölbreytni í atvinnulífinu (51), en einhæfni er skaðleg og skapar óþarfa sveiflur og því er mikilvægt að auka fjölbreytni atvinnulífsins hér á landi. Auk þess kemur í ljós að ímynd Íslands hefur beðið talsverða hnekki undanfarið, við þær efnahagsþrengingar sem riðið hafa yfir, en landið er einungis í 54. sæti þegar kemur að jákvæðri ímynd gagnvart uppbyggingu atvinnulífs hérlendis.

Rekstarar- og samkeppnisumhverfi fyrirtækja
Af könnuninni má ráða að aðilar hérlendis hafa meiri áhyggjur en aðrar þjóðir af aðkomu hins opinbera að eignarhaldi fyrirtækja (57) og áhrifum þess á samkeppnisumhverfið. Ekki er allt slæmt því Ísland kemur vel út í samanburði þegar kemur að stofnun fyrirtækja og flækjustigi við það ferli (6, 9 og 14).

Umgjörð fjárfestinga og aðgengi að fjármögnun
Af niðurstöðum könnunarinnar má einnig greina að aðgengi erlendra fjárfesta að fjárfestingatækifærum hérlendis er takmarkað og erfitt er að eignast hlut í íslenskum fyrirtækjum (57). Þar að auki eru hvatar fyrir erlenda fjárfesta takmarkaðir til að koma hingað til lands (55).

Einnig kemur fram að aðgengi fyrirtækja að fjármögnun á markaði er ekki nægjanlegt (56) auk þess sem hlutabréfamarkaðurinn er sjáanlega laskaður eftir efnahagshrunið. Af þessu má ráða að framundan er áframhaldandi uppbyggingarstarf í þágu íslensks atvinnulífs og hefur aldrei verið mikilvægara að stjórnvöld og viðskiptalíf snúi bökum saman. 

Sjá nánar >>

---

Þrír fjórðu landsmanna fylgjandi fækkun

Talsverð umræða hefur verið um fækkun ráðuneyta að undanförnu. Líkt og iðulega virðist sem tvær fylkingar hafi myndast um málið, önnur með og hin á móti, en lítið hefur borið á heildstæðum rökum þessara fylkinga. Önnur þeirra virðist þó eiga talsverðan samhljóm með landsmönnum, en skv. nýlegum Þjóðarpúlsi Capacent Gallup er það vilji þriggja fjórðu hluta landsmanna að ráðuneytum verði fækkað.

Viðskiptaráð hefur fyrir sitt leyti hvatt stjórnvöld til að láta verða af fækkun ráðuneyta og hefur ráðið áður lagt fram tillögur í þeim efnum. Telur ráðið að kostir slíkra breytingu séu fjölmargir. (Mynd: stjr.is) Meira >>

Bjartsýni í vikulok

Í ljósi mikils vægis neikvæðra frétta undanfarin misseri hefur Viðskiptaráð reynt að minna á það sem vel gengur.  Í þeim tilgangi hafa verið dregnir saman vikulegir punktar sem teljast til jákvæðra frétta og er það gert til að minna á að þrátt fyrir erfitt efnahagsástand hérlendis og erlendis er margt á réttri leið. Það er von Viðskiptaráðs að áður en um of langt líður horfi til betri vegar og samantekt af þessu tagi verði óþörf.

• Vöruskipti voru jákvæð um tæpa 6,4 ma. kr. í apríl, en fluttar voru út vörur fyrir tæpa 40,8 ma. k. og inn fyrir 34,4 ma. kr. Það sem af er árinu er vöruskiptajöfnuðurinn 9,2 milljörðum króna hagstæðari en á sama tíma í fyrra. Þetta kemur fram á vefsíðu Hagstofunnar.
• Lífeyrissjóðirnir hafa keypt Avensisbréfin svokölluðu sem Seðlabanki Íslands keypti af Seðlabankanum í Lúxemborg á dögunum. Við þessi viðskipti stækkar gjaldeyrisforði SÍ um 17%.
• Verkfræðistofan Verkís undirritaði nú í vikunni samning við Om Energy Generation um hönnun og ráðgjöf við 7 MW vatnsaflsvirkjun í Himachal Pradesh á Indlandi.
• Aflaverðmæti íslenskra skipa nam 20,6 milljörðum króna á fyrstu tveimur mánuðum ársins 2010 samanborið við 12,3 milljarða á sama tímabili 2009. Aflaverðmæti hefur því aukist um 4,5 milljarða eða 28% á milli ára.
• Gengi krónunnar hefur haldið áfram að styrkjast gagnvart evru nú í vikunni og kostaði evran nú í vikulok um 156,2 krónur.
• Ekki eiga öll evrópsk flugfélög við erfiðleika að stríða þessa dagana, en hagnaður Ryanair fyrir skatta nam 341 m. evra, eða 54,1 ma. kr. á síðasta rekstrarári. 

Góða helgi.

Í deiglunni:

Getum gert miklu betur! 

Viðmið um góða stjórnarhætti hafa með reglubundnum hætti verið í almennri umfjöllun fyrrihluta þessa áratugar.  Ljóst má vera að útgáfa Viðskiptaráðs Íslands, Samtaka atvinnulífsins og Kauphallarinnar á leiðbeiningum á því sviði hefur átt drjúgan þátt í því. Því miður er það hins vegar svo, þegar rýnt er til fortíðar, að umræðan náði ekki þeim árangri sem vonast var eftir. Almennar viðtökur við leiðbeiningunum ollu útgáfuaðilum þeirra og öðrum vonbrigðum. Meira >>

Viðburðir:

7.6.2010
Umbótaþing Viðskiptaráðs

Nánari upplýsingar um viðburði framundan má nálgast hér.

Gamla kornið:

Að gefnu tilefni viljum við benda félögum VÍ á að lesa vel gylliboð erlendra fyrirtækja á skráningu í telex-handbækur. Um allan heim eru verslunarráð að vara við hafsjó slíkra fyrirtækja, sem senda síðan ævintýralega háa reikninga eftir á. - Úr Viðskiptamálum, fréttabréfi Verzlunarráðs, í október 1986. 

Málefnahópar Viðskiptaráðs:

Stjórn Viðskiptaráðs hefur skipað málefnahópa sem marka munu stefnuna í mismunandi viðfangsefnum næstu misserin. Hóparnir eru þrír og er vinna þeirra í fullum gangi. Nánar hér.

Þjóðin býður heim:

Nú stendur yfir þjóðarátak til kynningar á Íslandi erlendis. Við hvetjum félaga Viðskiptaráðs til að senda kynningarmynd sem finna má á InspiredByIceland.com á tengiliði sína erlendis.