Fréttir vikunnar

Ný skoðun: Samstaða um bætt vinnubrögð

Nú í vikunni kom út ný skoðun Viðskiptaráðs þar sem fjallað er um fjárlagaferlið og tillögur til úrbóta þar að lútandi. Tillögurnar eru flestar byggðar á skýrslum Viðskiptaráðs frá júní 2008, Útþensla hins opinbera: orsakir, afleiðingar og úrbætur, og frá desember 2009 er nefnist Fjármál hins opinbera- aðrar leiðir færar. 

Meginregla fjárlagagerðarinnar sem nú er við lýði er að horfa til fjárlaga síðasta árs og gera síðan tillögu um hækkun í samræmi við verðlagsbreytingar frá fyrra ára, en þetta verklag endurspeglar ekki heildarfjárþörf stofnana og ríkis ár hvert. Til að sporna við því að útgjöld þenjist út ættu stjórnvöld því að leggja í heildstæða úttekt á öllum liðum fjárlaga, þar sem raunveruleg fjárþörf ráðuneyta og stofnana yrði metin frá grunni – svokölluð núllgrunns fjárlagagerð. Í raun býr slík endurskoðun til ákveðinn núllpunkt sem miðað er við í framhaldinu. Af því leiðir að stofnanir þurfa að réttlæta aukin útgjöld út frá þessum grunni.

Þessi aðferð hjálpar við að koma í veg fyrir að einstakir liðir hækki óeðlilega mikið og dregur úr sjálfvirku hækkunarferli sem innbyggt er í núverandi fyrirkomulag. Aðferðir sem þessar koma í veg fyrir sóun í ríkiskerfinu og stuðla jafnframt að því að skattfé borgaranna verði ráðstafað með sem hagkvæmustum hætti. Sjá nánar >>

Tillögur Viðskiptaráðs að bættu fjárlagaferli:

1. Heildarmat á fjárþörf hins opinbera
2. Bindandi útgjaldaþak
3. Útgjaldarammi miðist við fastan nafnvöxt
4. Drög að útgjaldarömmum birt
5. Bætt áætlanagerð

---

Skattstofnar að gefa undan?

Nú liggur fyrir greiðsluuppgjör ríkissjóðs fyrir fyrstu fjóra mánuði ársins. Af uppgjörinu að ráða þá eru flestir skattstofnar leynt og ljóst að dragast saman. Má þar nefna t.a.m. tekjuskatt lögaðila, fjármagnstekjuskatt, eignaskatt og virðisaukaskatt af atvinnustarfsemi.

Nokkrir þessara stofna t.a.m. tryggingargjald og virðisaukaskattur af vörum eru þó að skila ríkissjóði meiri tekjum en í fyrra svo einhverju muni, en í flestum tilfellum eru undirliggjandi skattstofnar að dragast saman.

Þessi þróun vegur að framtíðarskatttekjum ríkissjóðs og þar með markmiðum um jöfnuð í ríkisfjármálum. Meira >>
(Mynd: cb.is)

---

Umbætur fyrir íslenskt viðskiptalíf

Um 90 manns úr breiðum hópi félaga Viðskiptaráðs sóttu vel heppnað Umbótaþing ráðsins sem fram fór á mánudaginn í síðustu viku. Á þinginu komu fram fjöldi ábendinga um vandamál sem þarf að leysa og hugmyndir að úrbótum, sem þátttakendur færðu í sameiningu í fjölbreyttar tillögur að verkefnum fyrir viðskiptalífið. Auk þess sem félögum gafst tækifæri til að koma sjónarmiðum sínum um nauðsynlegar úrbætur á framfæri þá fólu þeir Viðskiptaráði margvísleg hlutverk við framkvæmd þessara verkefna.

Niðurstöður þingsins munu því setja mark sitt á starf ráðsins næstu misseri og veita stjórn þess leiðsögn um helstu áherslur. Vinnuhópur stjórnar ráðsins um sjálfbærni atvinnulífs kom að skipulagi þingsins og mun í framhaldi vinna, ásamt vinnuhópi um nýsköpun og um efnahagsmál, áfram með þær tillögur og hugmyndir sem fram komu. Meira >>

---

Óljóst hlutverk samráðsnefndar

Í apríl s.l. tilnefndi fjármálaráðherra starfshóp sem ætlað var að móta og setja fram heildstæðar tillögur um breytingar og umbætur á skattkerfinu.

Samhliða starfshópnum var sett á laggirnar samráðsnefnd sem hugsuð var sem vettvangur upplýsingamiðlunar og skoðanaskipta fyrir starfshópinn, en þar áttu sæti ýmsir aðilar vinnumarkaðarins.

Í síðastliðinni viku bárust fréttir úr fjármálaráðuneytinu þess efnis að auka eigi skatta og aðrar álögur á atvinnulífið um 11 ma.kr. Þessar ákvarðanir koma nú án nokkurs samráðs við áðurnefnda samráðsnefnds. Einkennilegt verður að teljast að boða til samráðs við fjölda aðila um mótun tillagna á skattkerfisbreytingum þegar þær virðast nú þegar hafa verið afgreiddar. Óljóst er því hvaða hlutverki áðurnefndri samráðsnefnd er ætlað í framhaldinu, en hana áttu að skipa fulltrúar fjölda hagsmunaaðila ásamt fulltrúum þingflokka. Meira >>
(Mynd: stjr.is)

Bjartsýni í vikulok

Í ljósi mikils vægis neikvæðra frétta undanfarin misseri hefur Viðskiptaráð reynt að minna á það sem vel gengur.  Í þeim tilgangi hafa verið dregnir saman vikulegir punktar sem teljast til jákvæðra frétta og er það gert til að minna á að þrátt fyrir erfitt efnahagsástand hérlendis og erlendis er margt á réttri leið. Það er von Viðskiptaráðs að áður en um of langt líður horfi til betri vegar og samantekt af þessu tagi verði óþörf.

• Bandaríska fyrirtækið Ticketmaster hefur tekið í notkun viðmót fyrir farsíma frá íslenska sprotafyrirtækinu Mobilitus, en þetta markar tímamót fyrir fyrirtækið.
• Framtakssjóður Íslands, sem er í eigu stærstu lífeyrissjóða landsins, tilkynnti í vikunni að hann mun fjárfesta í Icelandair Group hf. fyrir um þrjá milljarða króna.
• Raungengi krónunnar hækkaði í maí síðastliðnum, sjötta mánuðinn í röð, og hefur raungengi hennar hækkað um tæp 11% frá lægsta gildi sem náð var í ágúst á síðasta ári.
• Seðlabankinn skrifaði í síðustu viku undir tvíhliða gjaldmiðlaskiptasamning við Seðlabanka Kína að upphæð 66 ma.kr. eða 3,5 ma. kínverskra júan, og gildir hann í þrjú ár.
• Velta í dagvöruverslun jókst um 7,6% á föstu verðlagi frá fyrri mánuði. Gefur þetta vísbendingar um að einkaneysla sé nú að taka við sér eftir bakslag í vor.
• Erlend staða þjóðarbúsins er talsvert hagfelldari en bráðabirgðartölur Seðlabanks frá því í byrjun mánaðarins gáfu til kynna. Hrein staða við útlönd, í hlutfalli við landsframleiðslu síðasta árs, var neikvæð um 31% í lok mars mánuðar en ekki 72% eins og fyrri tölur gáfu til kynna.
• Nýverið seldi Skipti hf. upplýsingafyrirtækið Sirius IT, sem er með starfsemi í Danmörku, Noregi og Svíþjóð. Heildarhagnaður Skipta vegna fjárfestingarinnar nemur um 5,5, mö.kr.
• Atvinnuleysi í maí s.l. minnkaði um 0,7 prósentustig frá fyrri mánuði, en það mældist 8,3%.
• Ísland er 15. mesta fiskveiðiþjóð heims og borðum við einnig hvað mest af fiski í heiminum. Sjávarafurðir námu 42% af heildarútflutningsverðmæti frá landinu á árinu 2009, en þetta kom fram í tölum frá Íslandsbanka í s.l. viku.
• Gott verð hefur fengist fyrir ufsa á fiskmörkuðum og er nú kílóverðið komið í 170-190 krónur.
• Erlendir ferðamenn eru greinilega farnir að streyma til landsins, en heildarúttektir erlendra korta hér á landi námu 3,1 mö.kr. í maí. Það er langt yfir meðaltali síðustu mánaða en erlend kortavelta hér á landi nam 2,4 ma. kr. á mánuði að meðaltali fyrstu fjóra mánuði ársins. 

Gleðilegan þjóðhátíðardag, 17. júní.

Í deiglunni:

Getum gert miklu betur! 

Viðmið um góða stjórnarhætti hafa með reglubundnum hætti verið í almennri umfjöllun fyrrihluta þessa áratugar.  Ljóst má vera að útgáfa Viðskiptaráðs Íslands, Samtaka atvinnulífsins og Kauphallarinnar á leiðbeiningum á því sviði hefur átt drjúgan þátt í því. Því miður er það hins vegar svo, þegar rýnt er til fortíðar, að umræðan náði ekki þeim árangri sem vonast var eftir. Almennar viðtökur við leiðbeiningunum ollu útgáfuaðilum þeirra og öðrum vonbrigðum. Meira >>

Nýtt efni:

Skoðanir:
Ríkisfjármál - Samstaða um bætt vinnubrögð

Umsagnir:
Breyting á samkeppnislögum
Gjaldþrotalög

Gamla kornið:

Verzlunarráð Íslands hefur sótt um aðild EAN-nefndar að alþjóðlegu kerfi vörumerkinga, EAN númerakerfinu. Kerfið er annað af tveimur alþjóðlegum kerfum, sem náð hafa mestri útbreiðslu, og byggir það á 13 númeruðum rákum, sem gefa ýmsar upplýsingar um vöruna. - Um strikamerki í Viðskiptamálum, fréttabréfi Verzlunarráðs Íslands, í júní 1984.

Málefnahópar Viðskiptaráðs:

Stjórn Viðskiptaráðs hefur skipað málefnahópa sem marka munu stefnuna í mismunandi viðfangsefnum næstu misserin. Hóparnir eru þrír og er vinna þeirra í fullum gangi. Nánar hér.

Tillögur SA í ríkisfjármálum:

Í dag gáfu Samtök atvinnulífsins út tillögur að nauðsynlegum umbótum í fjármálum hins opinbera. Ritið má nálgast hér.

Vinsamlega athugið:

Fréttabréf Viðskiptaráðs er komið í sumarfrí og mun næst koma út í ágúst.